Schattenblick →INFOPOOL →BUCH → SACHBUCH

REZENSION/412: Christof Boeßner - Dat Blatt op Platt (Zeitschrift) (SB)


Christof Boeßner


Dat Blatt op Platt

Allerhand vun'e Waterkant ...



"Dat hört sick so parfümiert an", segg een, wenn een Nich- Plattdüütschen sick in platt verseuk, un mannimol uck, wenn een Plattschnacker wat op platt opschrievn dee. All, de dat, jüss so as eer Öllern un Grootöllern, mit'e Moddermelk insuup harrn, mookt dor nie veel Gewees um, för se is dat nich blots een Sprook, sünnern ehr 'n Instellung, een Levnsoord, de een "Butenlanner" (dorto tellt uck manni Düütsche) so gonnie mitkrich, sülvs, wenn'e al 'n lang Tied merrn mang sitt.

Op platt fackelt een nie lang, dat mutt rutkoom, as de Schnobel wussen is, direktemang vun Hart op'e Tong no buten. Aans kott un knapp, as wenn'e mit'e Fuust op'n Disch haut. Een klamüstert nich lang 'n "Konstrukt" ut Wöör tosoom, sick fein utdrücken un plattschnackn sünd as Woter un Füer. Un jüss dat ist dat, wat so'n Schrieverling nu mol utmookt: De schmirgelt un feilt an sien Schrievstück rum, bis dat sick good anhörn deiht.

De dat ernst is mit Schrievn, de schmirgelt, de dat ernst nimmt mit Platt, de will an dat, wat'e to seggn hett, nich een Woort ännern, toföögn or scheunschnacken. So blivv't för veele, de Platt blots vun buten kennt, nix anners, as sick över schlichte "Buernmentalität" vun'e Plattschnackers to höögn. Un ut sowat sünd denn allerhand pleesierli Theoterstücke, Hörspeels, Leeder, Vertelln un wat nich aans rutkoom.

Man dor dat nich mehr so veele Lüüd givv, de de Schnack vun eer Öllern un Grootöllern wiederdreeg, geiht dat mit'e Plattschnackerie mehr un mehr de Bach rünner. Un de, de sick dorgegnstellt, hebbn dat Ganze to'n Oort "Folklorekultur" verpampt, de, so scheun dat uck ween much, wenn sick een um düsse Sprook sorg, in eer "Künstlichkeit" för de echten Platten ehr pienli un aans annere as truuli düch.

Naja, dat's 'n Problem. Un so'ne Lüüd, de so'n feines "Blatt op Platt" rutbroch, stunn merrn mang düsse "Künstlichkeit" un eern ganz eegen Schnack, de oft noch vun een Dörp to'n annern ganz anners is un för de dat - to'n Glück! - keen Regeln un Wöörbööker givv.

Dat aans mook de Arbeit för de Redakschoon vun een "Blatt op Platt" to een viggelinsche Sook, se wüllt wat op Platt schrievn, dat, sülvs wenn se eern Wuddeln dorin harrn, man jümmers noch 'n beetn feilt, trechböög un uck för Hoochdüütsche lesbor mookt warrn mutt, so dat jüss de Kötte un mannimol uck de Witz vun'e Sprook afhann geiht. Dorto kummt noch, dat een "aktuell" ween un dorbie denn uck allerhand modern Tüüch bien Noom nenn mutt, för dat dat eegntli gorkeen Woord givv or dat een tominns anners segg. Dat dat sick dorbie denn mannimol 'n beetn "parfümiert", un af un an uck gonnie platt, sünnern riekli "gestelzt" anhört, mutt een jüm dor wull nosehn.

Sodenni harr'ck mi denn mit een lachn Oog (dat mol een wat op platt rutbrüng) un een ween Oog (wat dor so aans bie verlorngeiht) de Artikels towennt. Oha. Dor is je mol düchti rechercheert worrn. Keen fiev Minutn, un du büss merrn mang. Wenn Hans-Jürgen Foster wat över Wangeroog vertellt, denn rüüks bie't Lesn meis sülm de solti See, föhls de Sand ünner de Fööt un hörs de Möwn schriegen, so dicht bie is'e mit sien Vertelln över Land un Lüüd.

Ob över de Seenot-Redders (endli mol een Artikel, wo nich "Gischt un Bloot rutsprütt", sünnern mit allerhand, wat een noch nich doröver wuss), över de Geschich vun' Ohnsorg-Theoter or Wiehnachn in Island, dorvun schall mi nich een Woord dör de Lappn gohn. Sünnerli bie de Artikel "Störtebeker - Held oder Bandit" is mol een ganz wied indükert in'e Geschich, un hett dorbie anners wat rutholt, as wat een suns so över düssn Minschn to leesn krich. Thorsten Börnsen hett de "Mythos" 'n beetn utnannerpuult un dat Ganze ünner de Luup bekiekt, wobie nich mehr veel övri blivv vun düsse Heldnfigur. Man uck as Verbreeker lot he em nich dorstohn. Ehr noch höllt'e em för een Söldner, de in de ruugen Tieden vun Middelöller, wo veel Hunger un Not herrsch, vun de domolign Herrscher mang de Möhlnsteen koom weer. Denn hett'e sick sülvsstänni mookt, un dor de Hamborger Peppersäck dat gonnie verknuusen köönt, dat een anners as se sülm Rööverie bedrivv, hett em dat in wohrstn Sinn vun'e Woord de Kopp koss.

Sülvs de Werbung is op platt. Man wenn een dor mol neeger opkiek, blivv een dor meis de Spucke wech: "Wat de een sien Uul, is den annern sien Kaffee", heet dat dor. Hä? Un denn geiht dat wieder: "Wat gifft dat Beteres, as af un an een Klassiker to geneten?" Mannoman, hochdüütscher geiht' wull nie, meis as hett een Sprook-Computer dat Woord för Woord, een to een översett. Hebbt sick dat de Werbefritzen sülm utdach?! Man to lachn is dat allemol.

Wat kann Platt kott ween un doch veel seggn, jüss as de Werbung dat eegntli so gern hebbn will! Dor hett Emil Hecker (1897-1989) mol so 'n fein Bispill för gevn:

Kaffeestünn

Greten seggt: "Willem!"
Willem seggt: "No?"
Greten seggt: "Kaffee!"
Willem seggt: "Jo!"

Willem seggt: "Greten!"
Greten seggt: "No?"
Willem seggt: "Rohmputt!"
Greten seggt: "Jo!"

Greten seggt: "Willem!"
Willem seggt: "No?"
Greten seggt: "Sucker!"
Willem seggt: "Jo!"

Een lütte Tass vull,
denn sünd se satt;
Gret' langt noh'n Strichstrump,
Willem noh't Blatt.

Willem seggt: "Greten!"
Greten seggt: "No?"
"Krischon is dotblevn!"
Greten seggt: "Jo!"

Greten seggt: "Willem!"
Willem seggt: "No?"
"De Strump is för Lieschen!"
Willem seggt: "Jo!"

Willem seggt: "Greten!"
Greten seggt: "No?"
Willem seggt: "Melktied!"
Greten seggt: "Jo!"

Gret' packt den Strump weg,
Willem dat Blatt;
Kaffeestünn, Snackstünn,
de hefft se hatt!

(ut: "Hart wes man tofreden", Quickborn-Verlag, 1997)

Un wenn denn nu een Leser in een giftigen Breef segg, dat "Dat Blatt een geistigen Horizont hett, de bi'n Goorntuun to Enn is", denn kunn'ck blots seggn: Man good, dat dor 'n poor Lüüd sünd, de nich dat noplappert, wat een uck annerswo to lesn krich, un ut de eer regionalen Artikel nich rutkling, dat se blots för een hooge Oploog schrievn, wa?

9. Oktober 2007


Christof Boeßner:
Dat Blatt op Platt 1/2006, 46 Seiten
Dat Blatt op Platt 1/2007, 42 Seiten
4,80 Euro
E-Mail:info@dat-blatt.de
Internet: www.dat-blatt.de
ISSN 1862-2437